Концерт Государственного ансамбля кураистов Республики Башкортостан
Башҡортостан Республикаһы башлығы Р.Ф. Хәбировтың Указы буйынса 2024 йылдың мартында ойошторолған Башҡортостан Республикаһының Дәүләт ҡурайсылар ансамбленең таныштырыу концерты Республика көнөн байрам иткән осорҙа үтеүе тарихи, иҫтәлекле ваҡиға һәм оло әһәмиәткә эйә.
Ҡурай – ата-бабаларыбыҙҙың моң-зарын, шатлыҡ — ҡыуанысын, ғөмүмән, башҡорт халҡының данлы, аяныслы яҙмышын, тарихын беҙҙең көндәргә тиклем алып килеп еткереүсе, быуындан — быуынға тапшырыусы изге мираҫ, аманат ул. Ошо аманат бөгөн дәүләт яҡлауы, һаҡлауы аҫтында. Ҡурай – рәсми патент алған башҡорт музыка ҡоралы, Башҡортостандың дәүләт символы: республика гербында һәм флагында таҡыя башлы ҡурай сәскәһе алтын төҫтәр менән балҡый. Республиканың Дәүләт ансамблен төҙөү – ҙур әһәмиәткә эйә тарихи ваҡиға.
Ансамбль ҡыҫҡа ғына ваҡыт эсендә махсус музыка белемле өмөтлө йәш ҡурайсыларҙы туплап, эстәлекле репертуар өҫтөндә эшләп өлгөрҙө. Коллективтың тәүге сығышы Өфө ҡалаһының 450 йыллығы уңайынан 31 августа Боҙ Һарайында булды.
Танышыу (презентация) концертында ҡурайсылар быуаттар буйына телдән — телгә тапшырылған башҡорттарҙың бик боронғо көйҙәрен, халыҡ йырҙарын һәм башҡорт композиторҙарының әҫәрҙәрен башҡарасаҡ. Оҙон моңло көйҙәр менән бер рәттән, шаян, дәртле бейеү көйҙәрен, боронғо хәрби походтарҙа яңғыраған марштарҙы тамашасы хөкөмөнә сығарасаҡтар.
Яңы төҙөлгән ижад коллективының художество етәксеһе – Рәсәй Федерацияһының атҡаҙанған, Башҡорт ССР — ның халыҡ артисы, Башҡортостан Республикаһының Салауат Юлаев исемендәге Дәүләт премияһы лауреаты, Салауат Юлаев ордены кавалеры, виртуоз ҡурайсы Азат Миңнеғәли улы Айытҡолов.
Концерттың режиссеры – Башҡортостандың атҡаҙанған сәнғәт эшмәкәре, Башҡортостандың атҡаҙанған артисы Сулпан Асҡарова.
Башҡортостандың Дәүләт ҡурайсылар ансамбленә рухташ, терәк — таяныс булайыҡ! Тарихи ваҡиғанан ситтә ҡалмағыҙ! Халҡыбыҙҙың моңло ҡурайын данлаған концертҡа дәррәү килегеҙ, дуҫтар!
Билет хаҡы 300 – 1000 һум
Касса Башгосфилармонии: (347) 250-77-42
https://bashgf.ru
